ТҮРКІСТАН ТӨРІНДЕ БІЛІМ АЛ, ЖАС ТАЛАПКЕР!

Құрметті достар! Астана қаласындағы «Зерттеуші» Республикалық ғылыми-білім беру орталығы мен Түркістан қаласындағы Қ.А. Ясауи атындағы Халықаралық қазақ-түрік университеті «Түркістан төрінде білім ал, жас талапкер!» атты бірлескен арнайы PR-жобасын қолға алып отыр.

Бұл жобаны ұйымдастырудағы біздің негізгі мақсатымыз – 2014-2015 оқу жылында мектептер мен колледждерді бітіргелі отырған еліміздің дарынды, озық ойлы, үздік үлгерімді жастарын Тұңғыш Президентіміз – Елбасымыз Н.Ә. Назарбаевтың тікелей жеке бастамасымен қасиетті Түркістан қаласында шаңырақ көтерген, Қазақстан Республикасы Тәуелсіздігінің төл құрдасы – Қ.А. Ясауи атындағы Халықаралық қазақ-түрік университетінде, яғни Түркістан қаласының төрінде жоғары білім алуға шақыру.

«Түркістан төрінде білім ал, жас талапкер!» атты бірлескен арнайы PR-жобасының аясында атқарылатын іс-шаралар туралы «Зерттеуші» Республикалық ғылыми-білім беру орталығының zertteushi.kz Интернет-ресурсында арнайы ақпараттар жариялап отыратын боламыз.

Алдымен Қ.А. Ясауи атындағы Халықаралық қазақ-түрік университетінің тарихына қысқаша тоқталайық.

1991 жылғы 6 маусымда Елбасымыз Н.Ә. Назарбаевтың №329 Жарлығымен Түркістан мемлекеттік университеті құрылды.

1992 жылғы 1 мамырда Қазақстан Республикасының Президенті Н.Ә. Назарбаев пен Түркия Республикасының сол кездегі Премьер-министрі С. Демирелдің арнайы кездесуінде екі ел басшылары Түркістан мемлекеттік университетіне «Халықаралық университет» мәртебесін беру жөнінде келісімге келіп, «Түркістан қаласында Қожа Ахмет Ясауи атындағы Халықаралық қазақ-түрік университетін құру туралы» арнайы мәлімдеме жасады.

1992 жылғы 31 қазанда Анкара қаласында Қазақстан Республикасы мен Түркия Республикасы Үкіметтері арасында «Түркістан мемлекеттік университетін Қожа Ахмет Ясауи атындағы Халықаралық қазақ-түрік университеті етіп қайта құру туралы» арнайы құжатқа қол қойылды.

Бұл университет – түркі тілдес мемлекеттер арасында ең алғаш рет халықаралық мәртебені иеленген бірден-бір оқу орны.

Бүгінде осы жоғары оқу орнында түркі тілдес халықтар тұратын әлемнің 30-дан астам елінен келген жастар білім алуда.

Енді ғана құрылған алғашқы жылы университетке небары 332 талапкер оқуға қабылданған болса, қазіргі таңда мұнда 30 мыңға жуық студент қазақ, түрік, орыс және ағылшын тілдерінде білім алады.

Қ.А. Ясауи атындағы Халықаралық қазақ-түрік университетіне Қазақстан Республикасы Білім және ғылым министрлігінің Білім және ғылым саласындағы бақылау комитеті тарапынан 2010 жылдың 3 ақпанында АБ №0137408 мемлекеттік лицензиясы берілген.

Қ.А. Ясауи атындағы Халықаралық қазақ-түрік университетінде бакалавриат бағдарламасының – 54, магистратура бағдарламасының – 30, резидентура бағдарламасының – 3, PhD докторантурасы бағдарламасының – 11 мамандығы бойынша жоғары және жоғары оқу орнынан кейінгі білім алуға толық жағдай жасалған.

Білім ордасы Қазақстан мен Түркия тарапынан құрылған, құрамында 10 мүшесі бар Үкіметаралық Өкілетті Кеңес арқылы басқарылады.

Университеттің іргесі қаланған алғашқы жылдары Елбасымыз Н.Ә. Назарбаев: «Қожа Ахмет Ясауи атындағы Халықаралық қазақ-түрік университеті туысқан екі халық арасындағы байланысты нығайтып қана қоймайды, ол беделді білім және ғылым шаңырақтарының қатарына қосылады», - деп үлкен үміт артса, Түркия Республикасының бұрынғы басшысы Сүлейман Демирел: «...Ұлы ойшыл бабамыз Қожа Ахмет Ясауиге топырағы бұйырған қасиетті ата қонысымыз – Түркістанда шаңырақ көтерген бұл университет әлемдегі ең озық ғылым мен білім ордаларының біріне айналатынына кәміл сенемін», - деп ерекше сенім білдірген болатын.

Туысқан екі елге ортақ ерекше мәртебесі бар осынау жоғары оқу орны Сіздерді сапалы жоғары білім алуға шақырады, құрметті мектеп бітірушілері!

«Түркістан төрінде білім ал, жас талапкер!» атты бірлескен арнайы PR-жобасын жүзеге асырушылар:

Мырзантай ЖАҚЫП,
«Зерттеуші» Республикалық ғылыми-білім беру орталығының директоры, филология ғылымдарының кандидаты (PhD), доцент (of Associate Professor), Астана қаласы.

Ақәділ АЛАЙДАРОВ,
Қ.А. Ясауи атындағы Халықаралық қазақ-түрік университеті Кәсіби бағдар бөлімінің маманы, заң ғылымдарының магистрі, Түркістан қаласы.

03 желтоқсан, 2014 жыл.

Кез келген материалды пайдалануға zertteushi.kz Интернет-ресурсына сілтеме жасалғанда ғана рұқсат етіледі.

Жаңалықтар

07.11.2019
Елордамыз Нұр-Сұлтан қаласындағы «Зерттеуші» Республикалық ғылыми-білім беру орталығы» жеке меншік мекемесі еліміздің орта, кәсіптік және техникалық білім беру ұйымдары (мектептер мен колледждер) оқушылары арасында «БАЛА ҚҰҚЫҚТАРЫ» атты тақырыпқа эссе жазу конкурсын өткізетіні туралы хабарлайды.
04.11.2019
Елордамыз Нұр-Сұлтан қаласындағы «Зерттеуші» Республикалық ғылыми-білім беру орталығы» жеке меншік мекемесі еліміздің мектепке дейінгі ұйымдары (балалар бақшалары), орта білім беру ұйымдары (мектептер), техникалық және кәсіптік білім беру ұйымдары (колледждер) және жоғары және (немесе) жоғары оқу орнынан кейінгі білім беру ұйымдары (университеттер) педагог қызметкерлері арасында мектеп оқушыларына арналған «БАЛА ҚҰҚЫҚТАРЫ» оқу пәні бойынша білім беру бағдарламасын (одан әрі – Білім беру бағдарламасы) әзірлеу конкурсын өткізетіні туралы хабарлайды.
28.10.2019
Мырзашөл өңірінде балалар және білім беру саласындағы заң жобалары мен мемлекеттік бағдарламалар бойынша ақпараттық-түсіндіру жұмыстарын жүргіздік